საქართველოს ფინანსთა სამინისტროს საგამოძიებო სამსახურის უფროსი - სოსო რამიშვილი, სხვა ხელმძღვანელ პირებთან ერთად ოფიციალური ვიზიტით სომხეთის რესპუბლიკის სახელმწიფო შემოსავლების კომიტეტს ეწვია.
ვიზიტის ფარგლებში ორმხრივი შეხვედრები გაიმართა უწყებების პირველ პირებს შორის. მხარეებმა განიხილეს ისეთი მნიშვნელოვანი მიმართულებები, როგორებიცაა საფინანსო-ეკონომიკურ სფეროში ჩადენილი დანაშაულების წინააღმდეგ ბრძოლა, კომპეტენციის ფარგლებში ფინანსური და სხვა სახის დანაშაულების პრევენცია და სხვა საკითხები.
გაფორმდა ურთიერთგაგების მემორანდუმი, რომლის ფარგლებშიც საქართველოსა და სომხეთის რესპუბლიკის კოლეგა უწყებებს შორის, საფინანსო-ეკონომიკურ სფეროში ჩადენილი დანაშაულის გამოვლენის, აღკვეთისა და გამოძიების კუთხით ორმხრივი თანამშრომლობა კიდევ უფრო გაღრმავდება და გააქტიურდება.
ვიზიტის შედეგად, რომელშიც მონაწილეობდნენ ფინანსთა სამინისტროს საგამოძიებო სამსახურის უფროსის მოადგილეები, ვაჟა ფანოზიშვილი და ვახტანგ ფარესიშვილი, ასევე საგამოძიებო დეპარტამენტის უფროსი, ლევან ძნელაძე, დაიგეგმა კონკრეტული სამომავლო ღონისძიებები გამოცდილების გაზიარებისა და მისი პრაქტიკაში დანერგვის უზრუნველყოფის მიმართულებით.