საქართველოს ფინანსთა სამინისტროს საგამოძიებო სამსახურმა, დიდი ოდენობით სახელმწიფო თანხების თაღლითურად დაუფლების და ყალბი ოფიციალური დოკუმენტების დამზადება-გამოყენების ფაქტზე, ერთ-ერთი შპს-ის დამფუძნებელი და დირექტორი ა. მ. და მისი თანამზრახველი, გ. ვ. დააკავა.

დადგენილია, რომ კომპანიამ ტენდერში გამარჯვების გზით აიღო ვალდებულება ერთ-ერთი რაიონის სოფელში წყლის მრიცხველების მონტაჟის სამუშაოების შესრულებაზე. აღნიშნულმა პირებმა დაარღვიეს სახელშეკრულებო ვალდებულება და სამუშაოები არ შეასრულეს კონტრაქტით გათვალისწინებული პირობებით. გარდა ამისა, თანხის თაღლითურად დაუფლების მიზნით, დაამზადეს სამუშაოთა შესრულების ყალბი აქტები, ფორმა N2, რომლებშიც ნაცვლად რეალურად შესრულებული სამუშაოებისა, მიუთითეს, რომ თითქოსდა სრულად მოხდა სოფლის გამრიცხველიანება.

საქმეზე მიმდინარეობს გამოძიება საქართველოს სსკ-ის 180-ე და 362-ე მუხლით, რაც ითვალისწინებს თავისუფლების აღკვეთას 6-დან 9 წლამდე ვადით.