ბათუმში, სასტუმრო „რედისონში,“ საერთაშორისო სემინარი გაიხსნა, რომელიც კორუფციის, ეკონომიკური და ნარკოტიკული დანაშაულის წინააღმდეგ ბრძოლის ღონისძიებებს ეხება.
შეხვედრაში მონაწილეობენ აღმოსავლეთ ევროპისა და სამხრეთ კავკასიის ქვეყნების ანტიკორუფციული უწყებების ხელმძღვანელები და საერთაშორისო ექსპერტები.
სემინარი ფინანსთა მინისტრმა ნოდარ ხადურმა გახსნა, მონაწილეებს საგამოძიებო სამსახურის უფროსი ლერი ბარნაბიშვილი მიესალმა.
შეხვედრაზე აღმოსავლეთ ევროპისა და სამხრეთ კავკასიის ქვეყნების საგადასახადო და საგამოძიებო სამსახურების წარმომადგენლებმა ისაუბრეს კორუფციის პრევენციისთვის იურიდიული და ინსტიტუციური ზომების დანერგვის, ანტიკორუფციული ორგანოების პოტენციალის გაზრდის და განვითარების საკითხებზე. ასევე, სხვა ეკონომიკური დანაშაულის წინააღმდეგ ბრძოლის შესახებ.
სემინარი საქართველოს მთავრობის ხელშეწყობით და დონორი ორგანიზაციების, გაეროს ნარკომანიისა და კრიმინალის სამსახურის (UNODC), ევროპაში უშიშროების და თანამშრომლობის ორგანიზაციის (OSCE) ეკონომიკური და გარემოსდაცვითი ინიციატივების კოორდინატორის სამსახურის, ეკონომიკური თანამშრომლობის და განვითარების ორგანიზაციის (OECD) და აღმოსავლეთ ევროპისა და აზიის ანტიკორუფციული ქსელის (CAN) მხარდაჭერით ტარდება.