დღეს საქართველოს ფინანსთა სამინისტროს საგამოძიებო სამსახურის უფროსმა სოსო რამიშვილმა და უფროსის მოადგილე ვაჟა ფანოზიშვილმა, დაბა კოჯორ-ტაბახმელასთან 1921 წლის 25 თებერვალს საქართველოს დამოუკიდებლობისთვის ბრძოლაში გმირულად დაღუპულ ქართველ იუნკერთა ხსოვნას პატივი მიაგეს და იუნკერთა მემორიალი გვირგვინით შეამკეს.
საგამოძიებო სამსახურის უფროსმა, სოსო რამიშვილმა აღნიშნა, რომ საქართველოს დამოუკიდებლობისთვის ბრძოლაში დაღუპულ იუნკერთა თავდადება ყველა ქართველისთვის გმირობის მაგალითია.
საქართველოს დამოუკიდებლობისათვის ბრძოლაში დაღუპულ იუნკერთა ხსოვნისადმი მიძღვნილ ცერემონიას ასევე დაესწრნენ და წუთიერი დუმილით პატივი მიაგეს საგამოძიებო სამსახურის სპეციალური დანიშნულების რაზმის თანამშრომლებმა.
1921 წლის თებერვალში კოჯრისა და ტაბახმელას მიდამოებში, რუსეთის წითელ არმიასთან უთანასწორო ბრძოლა გაიმართა, საქართველოს დამოუკიდებლობისა და თავისუფლებისთვის ბრძოლაში იუნკერთა ნაწილი დაიღუპა. საქართველოში იუნკერების ხსოვნის დღე ყოველწლიურად 23 თებერვალს აღინიშნება.