ფინანსთა სამინისტროს საგამოძიებო სამსახურმა, სამსახურეობრივი გულგრილობის ჩადენის ფაქტზე სისხლის სამართლის პასუხისგებაში მისცა ერთ-ერთი მუნიციპალიტეტის გამგებლის მოადგილე, ლ. ბ. და ერთ-ერთი ქალაქის მერიის საფინანსო ეკონომიკური სამსახურის უფროსის მოადგილე, ა. ვ.
ჩატარებული გამოძიებით დადგენილია, რომ ქალაქის მერიამ ერთ-ერთ შპს-სთან გააფორმა ხელშეკრულება, ჟილინის არხის კაპიტალური სარეკონსტრუქციო სამუშაოების შესახებ. შპს-ს მხრიდან საბანკო გარანტიის წარდგენის შემდეგ მერიამ ავანსის სახით კომპანიას ჩაურიცხა 1 289 972 ლარი. მას შემდეგ, რაც კომპანიამ არაჯეროვნად შეასრულა სამუშაოები და მერიას წარუდგინა მხოლოდ 254 265 ლარის ღირებულების სამუშაოები, ბრალდებულებმა, ნაცვლად იმისა, რომ აემოქმედებინათ ერთ-ერთი სადაზღვევო კომპანიის მიერ გაცემული საბანკო გარანტიით გათვალისწინებული პირობები, გულგრილად მოეკიდნენ დაკისრებულ მოვალეობას და აღნიშნულ საწარმოს კვლავ გადაურიცხეს 236 000 ლარი.
ა. ვ-ს და ლ. ბ-ს აღნიშნულმა კანონსაწინააღმდეგო ქმედებამ განაპირობა სახელმწიფოს კანონიერი ინტერესის არსებითი დარღვევა და ამასთან, თვითმმართველი ქალაქ ბათუმისათვის განსაკუთრებით დიდი ოდენობით ზიანი გამოიწვია. საქმეზე გრძელდება გამოძიება სისხლის სამართლის კოდექსის 342-ე მუხლის პირველი ნაწილით, რაც 3 წლამდე თავისუფლების აღკვეთას ითვალისწინებს.