საქართველოს ფინანსთა სამინისტროს საგამოძიებო სამსახურის უფროსმა - სოსო რამიშვილმა, მოადგილეებსა და სსიპ - შემოსავლების სამსახურის ხელმძღვანელ პირებთან ერთად, სომხეთის რესპუბლიკის სახელმწიფო შემოსავლების კომიტეტს უმასპინძლეს. დელეგაციას ხელმძღვანელობდა კომიტეტის თავმჯდომარე - ედუარდ ჰაკობიანი.
შეხვედრაზე მხარეებმა განიხილეს კოლეგა უწყებების საქმიანობის სპეციფიკა და მათ კომპეტენციას მიკუთვნებული მნიშვნელოვანი საკითხები. აღინიშნა, ხომ მხარეებს შორის 2023 წელს გაფორმებული ურთიერთგაგების მემორანდუმის ფარგლებში, საქართველოსა და სომხეთის რესპუბლიკის კოლეგა უწყებებს შორის ორმხრივმა თანამშრომლობამ საფინანსო-ეკონომიკურ სფეროში ჩადენილი დანაშაულის გამოვლენის, აღკვეთისა და გამოძიების კუთხით ინტენსიური ხასიათი შეიძინა.
ქართული მხარის წარმომადგენლებმა, დელეგაციის წევრებს გაუზიარეს გამოცდილება საქონლის მოძრაობის აღრიცხვის, საგადასახადო დანაშაულთან ბრძოლის მექანიზმებისა და კიბერდანაშაულის წინააღმდეგ ბრძოლის მიმართულებით გადადგმული ნაბიჯების შესახებ.
მხარეებმა განიხილეს ორი ქვეყნის წინაშე არსებული გამოწვევები საფინანსო-ეკონომიკური დანაშაულის წინააღმდეგ ბრძოლის კუთხით და შემდგომი თანამშრომლობის გაღრმავების მიზნით, ძირითად მიმართულებებზე შეთანხმდნენ.