საქართველოს ფინანსთა სამინისტროს საგამოძიებო სამსახურის თანამშრომლებმა, გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, პროფესიული განათლების დამადასტურებელი ყალბი სერტიფიკატებისა და ბარათების დამზადება-გასაღების  ფაქტზე ერთი პირი დააკავეს.

გამოძიებით დადგინდა, რომ ბრალდებულმა, კვალიფიკაციის ასამაღლებელი ერთ-ერთი სასწავლო ცენტრის ხელმძღვანელმა, უკანონო მატერიალური სარგებლის მიღების მიზნით, შესაბამისი სასწავლო კურსის გავლის გარეშე, მოქალაქეს დაუმზადა და გაასაღა ელექტრიკოსის კვალიფიკაციის მიღების დამადასტურებელი ყალბი სერთიფიკატი და შესაბამისი ბარათი.

გამოძიება მიმდინარეობს საქართველოს სისხლის სამართლის კოდექსის 362-ე მუხლის პირველი და 180-ე მუხლის პირველი ნაწილებით, რაც სასჯელის სახით ითვალისწინებს თავისუფლების აღკვეთას 2-დან 4-წლამდე ვადით.