სიახლეები

საგამოძიებო სამსახური CEPOL-თან თანამშრომლობას აღრმავებს

09თებ 2018

საქართველოს ფინანსთა სამინისტროს საგამოძიებო სამსახურის საგამოძიებო დეპარტამენტის და ადმინისტრაციის ხელმძღვანელები საქართველოს შინაგან საქმეთა სამინისტროს აკადემიის წარმომადგენლებს  შეხვდნენ. შეხვედრის მიზანს წარმოადგენდა „ევროკავშირის სამართალდამცავ უწყებათა ტრენინგის სააგენტოს“ (CEPOL)  საქმიანობის იმ მიმართულებების გაცნობა, რომლებიც  საგამოძიებო სამსახურისთვის მნიშვნელოვანი და საინტერესოა.  


შეხვედრაზე მხარეებმა მიმდინარე წლის ღონისძიებები  და მომავალი თანამშრომლობის საკითხები განიხილეს და გასულ წელს განხორციელებული პროექტებიც შეაჯამეს. 


თანამშრომლების კვალიფიკაციის ამაღლების, საუკეთესო პრაქტიკის და გამოცდილების გაზიარების მიზნით, 2017 წლიდან ფინანსთა სამინისტროს საგამოძიებო სამსახურის თანამშრომლები  CEPOL-ის ტრენინგებში აქტიურად მონაწილეობენ.  კერძოდ, გაცვლითი პროგრამის ფარგლებში  საგამოძიებო სამსახურის წარმომადგენლებმა სასწავლო კურსი  პოლონეთის  და ბულგარეთის რესპუბლიკებში გაიარეს. 


CEPOL-სა და შსს-ს აკადემიას შორის 2011 წელს გაფორმდა თანამშრომლობის ხელშეკრულება, რომლის ფარგლებში კვალიფიკაციის ასამაღლებელი ტრენინგები და გაცვლითი პროგრამები ხორციელდება. CEPOL-ის მანდატის გაფართოების გათვალისწინებით, 2017 წლიდან შსს-ს აკადემიას შესაძლებლობა მიეცა CEPOL-თან თანამშრომლობის ფორმატში ჩართოს საქართველოს სხვა სამართალდამცავი უწყებებიც.


უნდა აღინიშნოს, რომ  აღმოსავლეთ პარტნიორობის ქვეყნებს შორის, საქართველო  პირველი ქვეყანაა, რომელსაც CEPOL-თან  მსგავსი ფორმატის თანამშრომლობის ხელშეკრულება აქვს გაფორმებული. 


CEPOL-ი წარმოადგენს ევროკავშირის სააგენტოს, რომელიც უზრუნველყოფს ევროკავშირის წევრი ქვეყნების სამართალდამცავი სტრუქტურებისთვის ტრენინგების ორგანიზებას, განხორციელებასა და კოორდინირებას. ქვეყნებს შორის თანამშრომლობის ხელშეწყობითა და ცოდნის გაზიარებით, CEPOL-ი  ევროპის უსაფრთხოებას უწყობს ხელს. 

კალენდარი

<სექტემბერი>
ორსაოთხუპაშაკვ
12
3456789
10111213141516
17181920212223
24252627282930